Celtics nanuktok sa East finals

LA Clippers 2-1 na batok Nuggets

CEBU, Philippines — Gidabodabohan sa Boston Celtics ang defending champion Toronto Raptors, 111-89 sa Game 5 aron pagposte og 3-2 nga bentaha sa ilang "best-of-seven" NBA Eastern Conference semifinal series kagahapon didto sa Orlando, Florida.

Wala na molingi pa ang Celtics human miposte og 25-11 nga labaw sa unang kuwarter hinungdan nga nagkinahanglan na lang sila og usa ka daog aron moabante sa Eastern Conference Finals.

Misamot og kainit ang Celtics sa ikaduhang kuwarter hinungdan nga ilang gilubong ang Raptors og 27 puntos sa halftime sa iskor nga 62-35.

Wala na makabangon pa sukad niadto ang nabungog nga Raptors.

Si Jaylen Brown maoy nangu sa Celtics uban ang 27 puntos, unom ka rebounds ug tulo ka steals.

Duna pa'y laing lima ka players nga mikadlit og double-figures timaan sa balanseng opensa sa Celtics. Si Kemba Walker midugang og 21 puntos, upat ka rebounds ug pito ka assists, si Jayson Tatum mitali og 18 puntos ug 10 ka rebounds, sila si Daniel Theis ug Brad Wanamaker dunay 15 puntos matag usa, samtang si Marcus Smart miamot og 12 puntos.

Si Fred VanVleet dunay 18 puntos alang sa Raptors, apan sila si Kyle Lowry ug Pascal Siakam naposasan ngadto lamang sa 10 puntos matag usa.

Sa Western Conference semis, si Paul George mihakot og 32 puntos ug si Kawhi Leonard mikandos og 23 puntos, 14 ka rebounds ug unom ka assists sa dihang gibaslan sa Los Angeles Clippers ang Denver Nuggets, 113-107 aron pagposte og 2-1 nga bentaha sa kaugalingon nilang serye.

Ang Clippers alkansi og siyete puntos, 97-90 sa nahibilin nga 8:29 sa duwa, apan milusad og nagbagang 14-4 run aron hingpit mailog ang labaw, 104-101.

Si Nikola Jokic dunay 32 puntos, 12 ka rebounds ug walo ka assists alang sa pilderong Nuggets.