Obiena kakasa sa Ostrava Golden Spike
Matapos ulanin ang Golden Roof Challenge
MANILA, Philippines — Matapos ihinto ang International Golden Roof Challenge sa Innsbruck, Austria dahil sa masamang panahon ay lulundag naman si Tokyo-bound pole vaulter Ernest John Obiena sa 59th Ostrava Golden Spike sa Czech Republic.
Hindi tinapos ang International Golden Roof Challenge bunga ng pagragasa ng malakas na ulan kamakalawa.
Sa nasabing kompetisyon ay nasa pang-limang puwesto si Obiena, isa sa apat na Filipino athletes na nakasikwat ng tiket sa 2021 Olympic Games sa Tokyo, Japan, sa nilundag na 5.30 metro.
Ito sana ang unang torneong lalahukan ng 2019 Southeast Asian Games gold medalist ngayong buwan matapos sumabak sa apat noong Agosto.
Sa nakaraang Janusz Kusocinski Memorial meet sa Chorzow, Poland ay tumapos siya sa fifth place sa nilundag na 5.62 metro.
Bago ito ay inangkin ni Obiena ang silver medal sa 13th Triveneto International Meeting sa Trieste, Italy, bronze medal sa IAAF World Diamond League Athletic Series sa Monaco at silver medal sa virtual competition na “Who is the Finest Pole Vaulter in the World?”.
Matapos ang 59th Ostrava Golden Spike ay lalahok ang 24-anyos na Pinoy pride sa apat hanggang limang kompetisyon.
Isa sa mga pinaghahandaan ni Obiena, nagsasanay sa ilalim ni Olympic legend Vitaly Petrov, ay ang Diamond League leg sa Setyembre 17 sa Rome/Naples, Italy.
- Latest
