Busy weekend na sab sa Cebu chess

CEBU, Philippines — Lain na sab nga hugot nga iskedyul ang nag-atang sa Cebu chess uban ang lima ka mga events karong weekend.

Sa alas-5 sa hapon karong adlawa, ang ikaunom nga edisyon sa binulan nga Stay at Home Chess Challenge nga giulohan og "The National" kumbatihan sa lichess.org ubos sa  Arena/No Berserk format.

Giorganisar ni International Master Kim Steven Yap sa Cebu School of Chess inabagan sa Chess Infinitum Inc. nga gipangulohan ni Benjamin "Boojie" Lim, ang Stay at Home chessfest nakadani og partisipasyon gikan nilang Grandmasters Mark Paragua, Joey Antonio ug Darwin Laylo, ug Woman GM Janelle Mae Frayna. Sa laing bahin, ang Cebu Executives and Professionals Chess Association (CEPCA) weekend online tournament banatan sa alas-2 sa hapon. Gisuportahan nilang Dr. Leo Lofranco, Engr. Bob Inocian ug Nic Cuizon, abli lamang kini sa mga Group B Cepcans ug ladies.

Karong Domingo, tulo ka mga torneyo ang pagaduwaon sugod sa Prexy Jerry Arena alang sa Group B Cepcans/Ladies sa alas-2 sa hapon.

Pagasundan kini sa Cepcan Alex Chua Super Blitz sa alas-5:30 sa hapon.

Abli sa tanang players sa nasud, ang torneyo gisuportahan nilang US-based Cepcans Alex Chua, usa ka nursing administrator sa Fidelity Healthcare didto sa Los Angeles, California, ug US candidate master Josito "Jojo" Clamor Dondon sa Allen, Texas.

Ang Ross Yamyamin Arena nga gikatakda sa alas-8 sa gabii maoy motak-op sa adlaw.

Eksklusibo lamang hinuon kini sa mga Cepcans ug lady players.