Clippers nakauna batok Mavericks
CEBU, Philippines — Nakauna ang Los Angeles Clippers batok sa Dallas Mavericks pinaagi sa pag-iskor og 118-110 nga kadaogan sa Game-1 sa "best-of-seven" NBA playoffs kagahapon didto sa Walt Disney World sports complex sa Orlando, Florida.
Si Kawhi Leonard mitali og 29 puntos ug 12 ka rebounds ug si Paul George miamot og 27 puntos sa Clippers nga mi-rally aron mapakgang ang Mavericks. Sama sa Clippers, nagmadaugon sab ang defending champion Toronto Raptors ug ang Boston Celtics sa laing pang buenang manong aksiyon sa dugay nang giatngan nga aksiyon sa post-season.
Si Fred VanVleet mipabuto og 30 puntos sa dihang gilubong sa Raptors ang Brooklyn Nets sa iskor nga 134-110, samtang si Jayson Tatum miposte og lay-off-career-high 32 puntos ug si Jaylen Brown mirehistro og 29 puntos alang sa Celtics nga mipukan sa Philadelphia 76ers, 109-101 sa pasiunang duwa sa kaugalingon nilang serye.
Sa West, wala magsilbe ang dalaygon nga salida ni Luka Doncic kay gipaga sila sa Clippers. Ang 21-anyos nga si Doncic mipatuasik og 40 puntos aron mamahimong labing unang player sa kasaysayan sa NBA nga nakapuntos og dili momenos 40 sa iyang playoff debut, butang nga gidayeg bisan mismo sa alas nga forward sa Clippers nga si George.
"He is the future," matud pa ni George agi'g pagsaludo ni Doncic nga mikuha sab og siyam ka assists ug pito ka rebounds.
Dako sab og natampo si Marcus Morris sa kampo sa Clippers nga mipupo og19 puntos.
Napiangan hinuon sa maong duwa ang Mavs human ang katumpang nga higante ni Doncic nga si Kristaps Porzingis na-ejected human kini misuway og uwang sa kagubot nga miulbo tali nilang Doncic ug Clippers. Si Porzingis mipupo og 14 puntos ug unom ka rebounds sa wala pa siya gipalayas sa korte.
- Latest
