Mitchell naka-record apan Jazz nahagba
CEBU, Philippines — Makalisang nga duwa ang gipakita ni Donovan Mitchell sa Utah Jazz.
Mibugwak siya og 57 puntos aron mamahimong labing bata nga player nga mikadlit og kapin 50 puntos sa playoffs sukad sa panahon ni Michael Jordan.
Apan nakawang ang esksplosibong salida ni Mitchell human ang Jazz gipukan sa Denver Nuggets sud sa overtime sa iskor nga135-125 pagsugod sa unang hugna sa "best-of-seven" NBA playoff series kagahapon didto sa Walt Disney World sports complex sa Orlando, Florida.
Pareho kaayo ang kasinatian nilang Jordan nga napilde sab sa dihang miiskor og 63 puntos batok sa Boston Celtics atol sa iyang panahon sa Chicaco Bulls niadtong dekada '90.
Si Mitchell napuhalan sa mangtas nga kombinasyon sa Nuggets nga sila si Nikola Jokic ug Jamal Murray nga nagkumboya'g 65 puntos, 15 ka rebounds ug 12 ka assists.
Sa dihang nagtabla ang iskor, 115-115 sa himalatyong segundos sa regulasyon, duna unta'y purohan ang Nuggets nga sayong modaog, apan nasipyat ang tira ni Dokic.
Sa overtime, gibinatan og maayo sa Nuggets ang misukarap nga Jazz pinaagi sa 11-2 run aron pagposte og nuybe puntos nga bentaha, 126-117 nga maoy nahimo nilang taytayan ngadto sa kadaogan.
- Latest