Sapatos ni Jordan nahalin P30 million
CEBU, Philippines — Usa ka pares sa sapatos nga gisul-ot ni NBA legend Michael Jordan sa usa ka duwa ang nahalin sa makabungog nga presyo nga $615,000 kon dul-an sa P30 million pinaagi sa Christie's auction house niadtong Biyernes.
Ang sapatos nga Nike Air Jordan 1 Highs gisul-ot sa kanhi Chicago Bulls superstar sa usa ka exhibition game didto sa Italy niadtong 1985 diin tungod sa kakusog sa paghansak niya sa bola, nabuak ang bildo nga backboard. Gani usa ka tipaka sa bildo nagtaop pa sa suwelas sa sapatos nga nahalin.
Si Jordan mikadlit og 30 puntos samtang nagsul-ot sa maong size 13.5 nga sapatos nga dunay kolor pula ug itom nga nagsimbolo sa Bulls.
Bisan tuod og gibuak niini ang rekord nga narehistro niadtong Mayo sa dihang nahalin ang pares sa Air Jordan 1s sa kantidad nga $560,000, ang bag-ong auction wala makaabot sa gibana-bana niining $650,000 ngadto sa $850,000 nga presyo sa makasaysayanong sapatos ni Jordan.
Misaka ug nimahal ang presyo sa mga gamit nga may kalambigitan ni Jordan sukad gipasalida ang "The Last Dance", ang dokumentaryo nga nagpakita sa mabulukon niyang karera uban sa Bulls ug nagpamatuod nga siya maoy angayang yukboan isip labing ngilngig nga basketbolista sa kasaysayan.
- Latest
