Coach alas saludo sa Cebuano players

CEBU, Philippines — Ang mga Sugboanon dunay dili maayong kasinatian ni coach Louie Alas kon basketbol maoy hisgutan.

Nahitabo kini kapin duha ka dekada na ang milabay.

Kini gumikan kay gibuak man ni Alas ang dughan sa Cebu Gems ug bagang panon sa mga fans niini atol sa dili hitupngang popularidad sa Metropolitan Basketball Associaion kon MBA.

Si Alas maoy head coach sa Manila Metrostars nga mipilde sa Gems, 4-2 sa ilang best-of-seven finals series aron ilhon nga MBA National Champions niadtong 1999.

Ubos sa liderato sa tirador nilang si Alex Compton, kansang back-up usa ka Sugboanon nga si Gilbert Demape, ang ubang sakop sa Metrostars nga nakampiyon sa MBA mao sila si Rommel Adducul, Don Camaso, Freche Ang, Reuben de la Rosa, Nandy Garcia, Nestor Echano, June Longalong, Jojo Brines, AC Brown, Peter Martin ug Jonathan Serrano.

Nahimo man tuod siyang kontrabida batok sa Cebu niadtong tungora, apan si Alas nagtamod ug taas ang pagtan-aw sa mga Sugboanong players.

Timaan niini, si Alas maoy midala ni Demape gikan sa PBL ngadto sa poder sa Metrostars diin sila parehong midimdim sa katam-is sa kalampusan.

Tulo ka tuig ang milabay isip coach sa Mobiline sa PBA, si Alas mao sa'y reponsabli sa pagpili ni Demape kay sa ni John Arigo isip top rookie pick sa Phone Pals niadtong 2002 PBA Draft.   Ang maong lakang ni Alas wala mauyoni sa mga kadagkoan sa Mobiline nga mipalagpot kaniya sa team.

Wala hinuon magmahay si Alas sa iyang gihimo gumikan kay mismo ang Amerikanong coach nga si Bill Bayno nga maoy mihulip sa iyang puwesto miangkon nga sakto ang iyang desisyon.

"He (Demape) played for the Metrostars under my tutelage so more or less I know his capabilities. Maraming against that decision pero as I've said, alam ko potential nya and yung pumalit sa akin na coach sa TNT (Bill Bayno) attested that picking Demape was the right choice," matud pa ni Alas.

Gawas ni Demape, lain pang mga Sugboanon nga nagiyahan ni Alas mao sila si kanhi PBA star Al Solis ug collegiate standouts Ramil Rey Tagupa ug Britt Carlo Reroma.

Si Alas nakaangkon og tumang respeto ug pagdayeg sa iyang pagsaludo sa talento sa Sugboanong mga basketbolista.

"Iyang gitrato nga pamilya ang iyang mga players. Basta ang importante, ihatag nimo ang iya nakita sa imo nga dinuwaan sa basketball.

Kung naa siya nakita weak nimo, iya ka i-improve sa practice.Sa batasan pud niya, sobra ka maayong tawo nga coach,"matud pa ni Demape, usa sa labing hait nga magduduwa sa Cebu Amateur Athletic Association (CESAFI na karon) atol sa iyang panahon uban sa Cebu Institute of Technology (CIT) Wildcats niadtong 1990s.

"Very disciplinarian and a player's coach," paghulagway pa ni Reroma lang Alas.

"He will let you make use of your skills and find ways to deal with certain situations on the playing court. He will always give you confidence. He really likes Bisaya players perhaps because they're fighters and courageous. He really wants you be a tough person inside the court," dugang pa ni Reroma nga nahimo sab nga champion coach diin iyang gitimon ang San Beda Red Cubs ngadto sa talagsaong grandslam sa NCAA niadtong 2010 ngadto sa      2012.

Si Alas mapasigarbuhon sa mga tropeyo ug pasidungog nga iyang naangkon sud sa mabulukon niyang karera nga milanat og 25 ka tuig na ug hangtod karon.