Sugboanang spikers mitapon sa Up

Cebu, Philippines — Kay nag-time out pa man ang basketball, ang volleyball mao usa ang mikawat sa eksena sa Cebu sports.

Kini human ang duha ka Sugbuanang spikers nga sila si Kirstin Louise Acebis Ojeda sa Sacred Heart School-Ateneo de Cebu (SHS-AdC) ug Ricalie Alukso sa Arcelo Memorial National High School sa lungsod sa Liloan ang mitapon sa University of the Philippines (UP)  Lady Maroons ubos ni Kenyan coach Godfrey Okumu sa UAAP.

Ang 5-foot-9 middle blocker/open spiker nga si Ojeda ug ang 5-foot-6 opposite spiker nga si Alukso dunay managlahing rason nganong ilang gipili nga mahimong kabahin sa  State U's women's volleyball team, kansang kasamtangang line-up naglangkob sab og tulo ka mga Sugboanon nga sila si Stephanie Bustrillo sa Medellin ug Justine Dorog ug Maria Lina Isabel Molde sa Catmon.Si Ojeda nga kanunay sakop sa Mythical Six ug Most Valuable Player uban sa SHS-Ateneo Magis Eagles sa nagkadaiyang mga torneyo nga ilang gisalmotan dinhi sa rehiyon, nagkanayon nga gawas nga gisaytan nang daan siya ni Okumu, damgo gyud niya nga tunghaan ang UP.  

"UP has always been my dream school. I followed my heart that made me decide to choose UP for college," matud pa sa 18-anyos nga si Ojeda nga natawo sa Cabadbaran City, Agusan del Norte apan nagdako sa Dakbayan sa Lapu-Lapu.

Samtang si Alukso nga makadaghan na sab na-MVP ug nakarepresentar sa Cebu Province sa Central Visayas Regional Athletic Association (CVIRAA) Meet tulo ka higayon, miingon nga salig siya sa programa sa volleyball sa UP nga iya sab nadungog mismo sa kanhi niya teammates sa Arcelo nga sila si Tethys Taneo ug Jum Marie Gayo nga mga reserves sa Lady Maroons sa pagka karon.

Sila si Ojeda ug Alukso parehong mipasalig nga buhaton ang tanan kutob sa ilang mahimo ug maningkamot og maayo aron makahatag og maayong representasyon sa UP dili lamang isip mga atleta, apan isip mga iskolar sa nasudnong unibersidad.