Suns nagkayo sud sa bubble

CEBU, Philippines — Gipahilum sa nagkayong Phoenix Suns ang Oklahoma City Thunder ug gilubong kini sa iskor nga 128-101 sa nagpadayong aksiyon sa National Basketball Association kagahapon.

Si Devin Booker mipabuhagay og 35 puntos uban ang lima ka rebounds ug upat ka assists alang sa Suns aron inaton ang wa'y pilde nilang ratsada ngadto sa unom ka duwa didto sa NBA bubble sa Orlando, Florida.

Mao kadto ang ikaupat nga higayon sud sa unom ka duwa diin si Booker mikadlit og kapin 30 puntos didto sa Walt Disney World diin tiwason sa NBA ang nahibiling bahin sa ilang season taliwala ning pandemiya.

Apil sa impresibong salida ni Booker mao ang paglansang og tres duol sa halfcourt nga nakapainat sa labaw sa Suns ngadto sa 13 puntos sa hinapos nga bahin sa ikatulong kuwarter.

Miabag ni Booker mao sila si Mikal Bridges ug Cameron Johnson nga dunay 18 puntos matag usa ug ingon man si Dario Saric nga mitali og 16 puntos alang sa Suns nga mipabuhi sa ilang tsansa nga makaabante sa playoffs.

Bukid pa hinuon maoy tungason sa Suns gumikan kay anaa pa man sila karon sa ika-10 nga puwesto sa Western Conference. Walo lamang ka teams ang makasud sa playoffs.

Sa laing duwa, si Kyle Kuzma miposa og tres sa himalatyong segundos aron tabangan ang Los Angeles Lakers nga modaog batok sa Denver Nuggets sa iskor nga 124-121

Sila si LeBron James ug Anthony Davis nagkumbinar og 56 puntos alang sa Lakers nga miputol sa tulo ka sagunson nilang pilde nga ilang natilawan sukad ilang giangkon ang No.1 spot sa Western Conference.

Samtang  ang Dallas Mavericks mipilde sa Utah Jazz 122-114 ubos sa pagpangu nilang Tim Hardaway Jr., Seth Curry ug Boban Marjanovic nga nakatigum og 69 puntos.

Sa Eastern Conference, ang defending champion Toronto Raptors mipahimus nga wala si Giannis Antetokounmpo aron payak-on ang Milwaukee Bucks, 114-106.  Si Chris Boucher maoy nangu sa Raptors uban ang 25 puntos inabagan ni Matt Thomas nga mitali og 22 puntos.