Gising PSC!—Go
Allowance ng athletes delayed
MANILA, Philippines — Nanawagan si Senator Bong Go sa Philippine Sports Commission (PSC) na tutukan ang pangunahing pangangailangan ng mga miyembro ng national team.
Partikular na tinukoy ni Go ang monthly allowances ng mga atleta matapos makatanggap ang opisina ng senador ng kaliwa’t kanang reklamo sa delay na paglalabas ng allowances.
Malaking bagay ang monthly allowances para sa mga atleta lalo pa’t dumaranas ng krisis ang bansa dahil sa coronavirus disease (COVID-19) pandemic.
Karamihan sa mga atleta ay sumasandal lamang sa buwanang allowances partikular na ang mga atletang nasa Maynila at malayo sa kanilang pamilya.
Ayon kay Go, na siyang chairman ng Senate Committee on Health and Sports, may mga atletang hindi pa nakatatanggap ng allowances para sa buwan ng Hunyo at Hulyo.
Kaya naman agad nitong kinalampag ang pamunuan ng PSC sa pangunguna ni chairman William “Butch” Ramirez.
“Tinatawagan ko ng pansin ang pamunuan ng PSC kung maaaring tingnan ang reklamong ito. Ayusin ang dapat ayusin at ibigay ang dapat ibigay,” ani Go.
Sinabi ni Go na ito ang panahon upang tutukan ng husto ang pangangailangan ng mga atleta na itinuturing na bayani ng bansa dahil sa mga karangalang ibinibigay nito sa international competitions.
Matatandaang kinaltasan kamakailan ng PSC ang allowance ng athletes at coaches dahil sa kakulangan sa pondo.
- Latest