Pagbabalik-ensayo nina Marcial, Magno naunsiyami
MANILA, Philippines — Wala pa ring katiyakan kung kailan makakabalik sa ensayo sina Olympic-bound national boxers Eumir Felix Marcial at Irish Magno.
Ito ay matapos ihayag ni Pangulong Rodrigo Duterte noong Linggo ng gabi ang pagpapatupad ng Modified Enhanced Community Quarantine (MECQ) sa Metro Manila, Bulacan, Laguna, Rizal at Cavite.
“Actually, hindi pa naman sila nagre-resume ng training except to do some jogging and exercises,” wika kahapon ni Philippine Sports Commissioner Charles Raymond Maxey sa mga national athletes.
Sina Marcial at Magno ay dalawa sa apat na national athletes na nakakuha ng tiket para sa 2021 Olympic Games na gagawin sa Tokyo, Japan.
Patuloy pa rin ang pag-eensayo nina gymnast Carlos Edriel Yulo at pole vaulter Ernest John Obiena sa Japan at Italy, ayon sa pagkakasunod, para sa 2021 Tokyo Olympics.
Tumatarget din ng Olympic berth sina 2016 Rio de Janeiro Olympics silver medalist Hidilyn Diaz, 2018 Asian Games gold medal winner Margielyn Didal, 2019 Southeast Asian Games queen Nesthy Petecio ng boxing, Kiyomi Watanabe ng judo at Jamie Lim, Fil-Japanese Junna Tsukii at Fil-Am Joane Orbon ng karate.
Kagaya nina Marcial at Magno at iba ang Olympic hopefuls ay nadiskaril din ang pagbabalik-operasyon ng mga gyms at fitness centers dahil sa pagpapatupad ng MECQ.
Nauna nang pinayagan ng Inter-Agency Task Force for Emerging Infectious Diseases (IATF-EID) noong Sabado na makabalik sa operasyon ang mga gyms, fitness centers, review centers, internet shops, personal grooming services at drive-in cinemas.
- Latest
