PBA, boxing makaduwa ubos sa MGCQ?

CEBU, Philippines — Ang plano sa PBA nga tiwason ang nahunong niining Season 45 karong Septiyembre lagmit mahitabo kon ipaubos na sa mas luag nga kwarantin ang Metro Manila.

Kini gumikan kay ang Joint Administrative Order (JAO) sa Inter Agency Task Force (IATF) nga gipirmahan sa Department of Health, Games and Amusements Board ug Philippine Sports Commission naglatid nga posibleng tugotan niini mga duwa sa pro sports sa nasud sa mga lugar diin ubos ang risgo sa coronavirus. Gawas sa PBA, naglangkob sab sa mga pro sports sa nasud ang boxing, MMA (mixed martial arts) ug Muay Thai.

"Practice and actual games for professional sports as well as combat sports may be allowed provided that the minimum public health standards are met," segun pa sa usa ka probisyon sa JAO. "Provided further that participants have no symptoms consistent with COVID-19 for the past 14 days prior to resumption of the activity and subject to observance of self-quarantine and strict monitoring of health status after the activity," dugang pa niini.

Kon ugaling dunay mahitabong mga duwa o away, ipahigayon kini sa closed-door venue diin wa'y fans nga manan-aw.