Olympics imposibleng mai-host ng Pilipinas
MANILA, Philippines — Hindi maikukumpara ang pagdaraos ng Olympic Games sa Southeast Asian Games.
Sinabi ni International Olympic Committee (IOC) Executive Board member Mikee Cojuangco-Jaworski na masyadong mabusisi ang paghahanda ng Olympic Games kumpara sa SEA Games.
“I think complex ‘yung organization ng Olympics because the demands are quite different although siyempre ‘yung SEA Games ang daming events but I can definitely say that the demands for hosting an Olympic Games are a lot more intense than the SEA Games,” ani Cojuangco-Jaworski.
Dahil sa coronavirus disease (COVID-19) pandemic ay iniurong ang pagdaraos ng 2020 Olympic Games sa Tokyo, Japan sa susunod na taon.
Bago naman pumutok ang COVID-19 ay matagumpay na nairaos ng Pilipinas ang 30th edition ng SEA Games noong Disyembre kung saan tinanghal na overall champion ang mga Pinoy athletes.
Suntok sa buwan kung makakaya ng bansa na makapag-host ng isang Olympic Games, ayon sa 2002 Asian Games gold medalist na si Cojuangco-Jaworski.
Apat na beses naging host ng SEA Games ang bansa at ito ay noong 1981, 1991, 2005 at 2019.
Una at huli namang nakapagdaos ang bansa ng Asian Games noong 1954 sa Manila sa panahon ni Pangulong Ramon Magsaysay na nilahukan ng 18 bansa.
- Latest
