Irving modonar og $1.5m sa WNBA
CEBU, Philippines — Misaad si Brooklyn Nets superstar Kyrie Irving nga modonar og $1.5 million isip pinansiyal nga tabang alang sa mga WNBA players nga dili na moduwa sa nahibiling bahin sa season. Gipahibawo ni Irving kagahapon nga iyang iapud-apod ang kuwarta gikan sa pundo sa bag-o pa niyang gitukod nga KAI Empowerment Initiative.
Pipila na ka mga players ang nakahukom nga dili motiwas sa nahibiling bahin sa gimubo nga WNBA season gumikan sa nagpadayong hulga sa coronavirus ug ingon man sa mga isyu kabahin sa repora sa social justice didto sa Amerika.
Nagkanayon si Irving nga iyang nahulma ang programa human nakaestorya ang duha ka bitoon sa WNBA nga sila si Natasha Cloud ug Jewell Loyd. Si Cloud, ang alas sa Washington Mystics, usa sa labing unang players nga nakadisider nga dili na mopadayon pa og duwa ning season. Ang nahunong nga WNBA season nagsugod og balik niadtong Domingo diin ang tanang teams miduwa sa usa ka lokasyon didto sa Bradenton, Florida.
- Latest