Antonio babandera sa Team Philippines
Sa chess olympiad online c’ships
MANILA, Philippines — Ang beterano pa ring si Filipino Grand Master Rogelio ‘Joey’ Antonio Jr. ang inaasahang babandera sa kampanya ng Philippine national team sa 2020 FIDE Chess Olympiad Online Championships.
Kumpiyansa si GM Eugene Torre na dadalhin ng 58-anyos ang laban ng bansa sa nasabing torneo na magsisimula ngayon.
“Nagkampeon si Joey sa Asian Seniors online meet, kaya ‘yung preparation niya mataas talaga,” sabi ng 68-anyos na si Torre kahapon sa Tabloids Organization in Philippine Sports (TOPS) ‘Usapang Sports’ via zoom at livestream sa Youtube at Facebook ng Sports on Air.
Kasama ni Antonio, ang 13-time national champion at 10-time Olympian, sa koponan sina GM Mark Paragua, GM Darwin Laylo at Woman IM Catherine Secopito at Bernadette Galas, Michael Concio at Jerlyn Mae San Diego.
Ang Team Philippines ay nasa Division 2 kasama ng Gemany, Romania, Turkey, Greece, Spain, Italy, England, Hungary, Israel, Belarus, Sweden, Croatia, Indonesia, Serbia, Bulgaria, Slovenia, Slovakia, Colombia, Ecuador, North Macedonia, Latvia, Switzerland, Norway, Argentina, Austria, Bangladesh, Australia, Moldova, Iceland, Montenegro, Turkmenistan, Kyrgyzstan, Estonia at Netherlands.
“Seeded tayo sa Division 2 kaya sa August 15 pa ang laban ng team kaya mahaba pa ang preparasyon,” sabi ni National Chess Federation of the Philippines (NCFP) Executive Director Atty. Cliburn Orbe.
- Latest
