Ginebra rookie gi-idolo si Danny I

CEBU, Philippines — Usa si Arvin Tolentino nga lunod patay nga dumadapig sa Barangay Ginebra Kings.

Apan ang gi-idolo niyang player usa ka bitoon sa San Miguel Beermen.

Atol sa PBA Kamustahan:Rookie Edition, ang rookie sa Ginebra mikumpisal nga iyang gidayeg ug gitamod sukad pa sa iyang pagkabata si two-time PBA MVP Danny Ildefonso.

"Si 'Lakay' fan ako since noong bata ako," matud pa ni Tolentino diin ang gipasabot mao ang 43 anyos nga si Ildefonso nga assistant coach na karon sa Alaska Aves."Siya talaga yung pinapanood ko sa PBA nung San Miguel days niya, although Ginebra fan talaga ako."

Midugang si Tolentino nga kon ugaling mag-abot na ang Ginebra ug San Miguel, sa hilom moabiba siya ni Ildefonso.

Suwerte kaayo ang 24-anyos nga si Tolentino gumikan kay gikuha siya sa Ginebra sa unang hugna sa 2019 PBA Draft niadtong Disyembre. Gipapirma dayon siya og usa ka tuig nga kontrata sa Kings. Sa Ginebra, si Tolentino maghiusa og balik sa iyang college coach nga si Olsen Racela nga usa sa mga assistants ni head coach Tim Cone.

Sulagma kaayo nga si Racela maoy top pointguard sa San Miguel panahon sa pagkasikat ni Ildefonso sul-ot ang uniporme sa Beermen.