PBA lalapit ulit sa IATF
Scrimmages hihilinging payagan na rin
MANILA, Philippines — Muling dudulog ang Philippine Basketball Association (PBA) Inter-Agency Task Force on Emerging Infectious Diseases para hilinging payagan ang scrimmages.
Nauna nang pinahintulutan ng IATF ang lahat ng koponan sa PBA na makapag-ensayo subalit walang scrimmages at 5-on-5 practices para maiwasan ang pagkalat ng coronavirus disease (COVID-19).
Kaya naman lalapit ang PBA sa IATF para masimulan na rin ang mas intensibong workout bilang paghahanda sa muling pagbubukas ng liga.
Target ni PBA commissioner Willie Marcial na masimulan ang scrimmages sa Agosto sakaling makakuha ito ng go-signal mula sa IATF na siyang nagpapatupad ng mga patakarang may kinalaman sa COVID-19 pandemic.
Bago magsimula ang ensayo, kailangan munang sumailalim sa swab testing ang lahat ng miyembro ng isang koponan para masiguro na walang coronavirus ang mga sasalang sa practice.
Tiniyak din ni Marcial na sasagutin ng team owners ang lahat ng gastusin sa hospital sinuman ang tamaan ng virus.
“Sasagutin ng teams lahat ng hospital expenses ‘pag nagka-COVID ang players. Just like when players get injured. So there’s no need for any insurance,” ani Marcial.
Kaya naman kailangang maging disiplinado ang lahat ng players, coaches at officials sa pagsunod sa matinding patakarang ipatutupad sa ensayo.
Maglalatag din ng matinding parusa sinuman ang lumabag sa mga patakarang ipatutupad.
Kung dati, sa tuwing lalabag ang mga manlalaro sa quarantine rules, tanging PBA lamang ang nagpapataw ng parusa at multa.
Ngayon, maliban sa PBA, magbibigay din ng parusa at penalty ang mother team sakaling lumabag ang isang miyembro ng koponan nito.
- Latest
