Kawhi sasailalim sa quarantine protocol; LeBron ‘di magsusuot ng social justice message sa jersey

ORLANDO, Florida -- Dumating na rito kahapon si Kawhi Leonard para sa restart ng 2019-2020 NBA season at kasalukuyang sumasailalim sa quarantine protocol bago sumama sa Los Angeles Clippers.

Sinabi ni Clippers head coach Doc Rivers na dalawang araw sasalang sa quarantine si Leonard bago sumabak sa kanilang team activities.

Hindi sumabay si Leonard sa koponan nang bumiyahe patungong Orlando noong nakaraang linggo.

Nagtala ang Clippers ng 44-20 record para sa No. 2 spot sa Western Conference nang suspindihin ang mga laro noong Marso dahil sa novel coronavirus pandemic.

Wala namang plano si LeBron James ng Los Angeles Lakers na magsuot ng NBA-approved na social justice messages sa kanyang jersey.

“I commend anyone that decides to put something on the back of their jersey. It’s just something that didn’t seriously resonate with my mission, with my goal,” paliwanag ni James.

Samantala, sinabihan ni coach Nick Nurse ang nagdedepensang Toronto Raptors na huwag maging ‘excited’ sa kanilang pagbabalik-ensayo.

Magsisimula ang NBA scrimmages sa Hulyo 22 kung saan lalabanan ng Raptors ang Houston Rockets sa Hulyo 24.