Laing pinoy manulong away sa Las Vegas

CEBU, Philippines — Human mapakyas sud sa duha ka higayon, ang beteranong Pinoy nga si Mark John 'Journey Man' Yap (30-15, 15KOs) nanghinaut nga makatali na og daog didto sa Amerika sa dihang iyang sangkaon si three-time world title challenger Miguel 'Scorpion' Marriaga (29-3, 25KOs) sa Colombia karong Hulyo 17 didto sa MGM Grand sa Las Vegas.

Ang garbo sa Cagayan de Oro City nga si Yap nga atua na karon magbasi sa Osaka, Japan maoy ikatulong Pinoy nga moaway sukad sa pagsugod og balik sa pro boxing sa miaging bulan sunod nilang 'Magic' Mike Plania ug Mark 'Machete' Bernaldez nga parehong batos sa Sanman Gym sa General Santos City.

Si Plania mipakurat ni WBO top bantamweight contender Joshua 'Don't Blink' Greer Jr., samtang si Bernaldez napilde pinaagi sa unanimous decision batok ni Albert Bell.

Ang 31-anyos nga si Yap mosuway pagsuwat sa kaugalingon niyang estorya uban ang laraw nga pakgangon ang duha ka sagunson niyang pilde sa US, ang katapusan batok sa wa'y pildeng si Angel Aejandro niadtong Nobiyembre 23 didto sa MGM Grand.

Si Yap nga kanhi WBC Oriental and Pacific Boxing Federation (OPBF) bantamweight champion, 13 ka tuig nang pro ug wala na matumba pa sukad niadtong 2014.

Angayan hinuon siyang mangandam sa usa ka bug-at nga hagit batok ni Marriaga nga naglantaw kaniya nga hagdanan sa tinguha niining makaaway alang sa world title sa ikaupat nga higayon.

Naparot si Marriaga sa iyang world championship bouts batok ni Nicholas Walters (WBA featherweight), Oscar Valdez (WBO featherweight) ug Vasiliy Lomachenko (WBO super featherweight).

Apan mangtas siyang mibangon human sa iyang kapildihan sa mga kamot ni Lomachenko niadtong 2017 pinaagi sa pagkulit og upat ka sagunson nga daog pinaagi sa knockout, butang nga angayan bantayan ni Yap.