Mikey Garcia naglungot-lungot makasangka si Pacquiao
CEBU, Philippines — Si four-division world champion Mikey Garcia (40-1, 30KOs) sa Amerika nagpanikad nang mobalik sa aksiyon ug kon maabot na ang panahon wala siya'y laing buot kontrahon kondili si Pinoy ring star Manny Pacquiao. Sa dihang nahinabi ni Rainbow Alexander sa Fight Hype, si Garcia mikumpisal nga ang pakigharong ni Pacquiao maoy nag-una niyang tumong. Timaan niini, ila na kining gihisgutan sa wala pa ang iyang away ni Jessie Vargas sa sayong bahin ning tuiga.
Apan wala makaarangkada ang negosasyon tali sa kampo nilang Garcia ug Pacquiao human miulbo ang pandemiya niadtong Marso.
“We were talking to team Pacquiao earlier in the year before my fight with Jessie (Vargas) and they were excited to possibly get a fight with me but this whole Covid situation came down, came down on everybody and it really slowed down things,” sumala pa ni Garcia ngadtong Alexander.
Sa pagka karon, ang 32-anyos nga si Garcia mipadayag nga wala pa siya mahibawo kon gusto pa ba ni Pacquiao nga makigsangka kaniya o dili na kay sayod man siya nga si Pacquiao daghan kaayo og opsiyon nga pagalantawon. Nagpabilin hinuon nga malaumon si Garcia nga makaharong niya si Pacquiao sa umaabot ug ilogon ang WBA welterweight title niini aron kab-uton ang iyang misyon nga mamahimong five-division world champion.
"I would love to get a fight with Manny, I think that would be a terrific fight. Styles make fights and I think that would be great not only for me but the fans would really enjoy it," batbat pa ni Garcia.
- Latest
