Slaughter pumirma sa BeoBasket
Susubok sa NBA, Euroleague?
MANILA, Philippines — Desidido si dating Barangay Ginebra slotman Greg Slaughter na dalhin ang kanyang talento sa international stage matapos pumirma sa BeoBasket na isang international basketball agency.
Mismong si Slaughter ang nag-anunsiyo ng kanyang pagpirma sa BeoBasket na siyang makikipag-negotiate sa mga koponan na posibleng kumuha sa serbisyo ng Pinoy cager.
Pag-aari ni Serbian lawyer at agent Misko Raznatovic ang BeoBasket gayundin ang Mega Basket club sa Serbian league.
“I am very happy to announce that I’ve signed with @misko4raznatovic, owner of BeoBasket, the biggest international basketball agency in the world,” ani Slaughter.
Isang malaking ahensiya ang BeoBasket na humahawak sa malalaking atletang naglalaro sa NBA, EuroLeague at mga liga sa Asya.
“They represent many athletes whom I greatly admire that compete in the NBA, EuroLeague, and Asia,” wika pa ni Slaughter.
Ilan sa mga hinahawakan ng BeoBasket ay sina Nikola Jokic, Boban Marjanovic at Cedi Osman gayundin ang ilang manlalarong nasilayan sa 2019 FIBA World Cup.
Si Slaughter ang kauna-unahang Pilipino na hahawakan ng BeoBasket kaya’t masaya ito na maging magandang kinatawan ng Pilipinas sa naturang grupo.
“They also represented the most number of players competing in the 2019 World Cup and I look forward to adding to that in 2023! I am also extremely honored to be the first Filipino player in their roster,” ani Slaughter.
Kung papalaring makapaglaro sa international level, makakasama si Slaughter sa listahan na masisilayan sa aksyon sa ibang bansa.
Una nang pumirma ng kontrata si UAAP Juniors MVP Kai Sotto para sa select team sa NBA G League habang masisilayan naman sa aksyon si three-time UAAP Finals MVP Thirdy Ravena sa B.League sa Japan.
Hiniling ni Slaughter na patuloy itong suportahan sa kanyang mga ginagawa dahil nangingibabaw pa rin ang pagiging Pilipino sa kanyang puso.
“Wherever my journey takes me, I will always proudly represent the Philippines, especially our National Team. I will forever be humbled by the opportunities basketball and its fans have given me. Salamat sa pagpatuloy na suporta,” ani Slaughter.
Hindi na na-renew ang kontrata ni Slaughter sa Gin Kings noong Pebrero.
Isiniwalat ni Barangay Ginebra head coach Tim Cone kamakailan na nabalitaan nitong target ni Slaughter na subukan ang kapalaran sa international scene.
- Latest
