Garbo ni Boy Cabahug

CEBU, Philippines — Pagsemento legasiya sa iyang pamilya uban sa UV Lancers.

Naglatay sa iyang kaugatan ang basketbol.

Ang iyang apohan nga si Atty. Cesar Cabahug,  haligi sa Visayan Institute ballclub (karon mao na ang  University of the Visayas) nga nahimong National Open champion niadtong 1938 ug maoy bugtong team nga nakapilde sa bisitang Waseda University sa Japan sa susamang tuig.

Ang iyang amahan, si Eduardo 'Skipper' Cabahug, maoy top gunner ug co-captain sa UV Green Lancers nga naghari sa 2nd National Inter-Collegiate Championships didto sa Rizal Memorial Coliseum sa Manila niadtong 1957.

Ubos ni coach Eduardo 'Eddiegul' R. Gullas ug sa manghod niining si Jose 'Dodong' R. Gullas nga nagsilbeng co-captain, gibuntog sa UV ang Ateneo Blue Eagles sa final, 64-53 sa labing unang duwa nga gipasalida sa telebisyon sa kasaysayan sa Philippine basketball.

Sa dihang miabot na ang iyang panahon nga modala sa sulo sa dalaygong kampanya sa iyang pamilya uban sa UV Lancers, misidlak sab si Elmer 'Boy' Cabahug sama sa iyang kagikan. Si Boy Cabahug nakaangkon og dungog isip labing una ug bugtong UV player nga nakadaog og MVP award, championship ug National Inter-Collegiate title sa high school ug kolehiyo.

Gibayaw siya nga Juniors MVP sa Cebu Amateur Athletic Association (CESAFI na karon) niadtong 1981, ang tuig diin ang Baby Lancers mibira sa korona sa CAAA ug  nakampiyon sa National Inter-Secondary Championships human ilang gibuntog ang San Beda Red Cubs nga gipangulohan nilang Ronnie Magsanoc ug Dindo Pumaren niadtong panahona.

Sa kolehiyo, gipasidunggan siya nga season MVP human gitabangan ang Lancers ngadto sa 1983 CAAA title. Sa sunod tuig diin lakip sa notado niyang mga kauban sila si Al Solis ug Anthony Mendoza, ilang gibihag ang Arellano University Flaming Arrows aron langkaton ang titulo sa 1984 National Inter-Collegiate Champions.

Ang impresibo niyang salida isip amateur player nahimo niyang hagdanan aron mamahimong sakop sa national team ug dayon na ngadto sa PBA human siya gikuha isip second round pick sa Alaska ug 8th overall niadtong 1989 Draft.

Sa iyang rookie season, mihimo dayon siya og impresyon human ginganlan nga 1989 PBA All-Star MVP. Human sa 10 ka tuig sa PBA bawon ang duha ka kampiyonato ug usa ka selection sa Mythical Second Team, ang gibansagan nga "The Silencer ug "The Hitman" nakahukom siya nga mobiya sa liga.

Sa iyang pagbalik sa Sugbo, nakaplagan ni Cabahug ang bulawanong oportunidad nga makahatag og balik sa iyang tunghaan isip head coach sa UV Lancers sa CAAA nga ginganlan na og CESAFI niadtong 2001.

Ubos sa iyang pagtimon, ang Lancers nibira og siyam ka sagunson nga korona sa CESAFI hangtod sa 2009, usa ka rekord nga hangtod karon pabiling nagbarog ug daw imposibleng malabwan o bisan matupngan man lamang.

Balik lantaw sa mabungahon niyang kaagi, ang 56-anyos nga si Cabahug mikosinderar sa iyang pagkasakop sa national team ug pagtaak sa PBA isip usa sa labing dako niyang nakab-ot sa iyang karera.

Apan dili sab niya malimod nga ikapasigarbo og maayo nga kabahin siya sa napundar nga legasiya sa iyang pamilya uban sa UV Lancers.

"Being part of three generations of basketball players with the UV Green Lancers, from Lolo Cesar, Papa Eddie and me, is something that I am very proud of since we contributed and gave honor to the reputation of the University of the Visayas," paambit pa ni Cabahug.