Kaayohan sa Pinoy olympians gilantaw

CEBU, Philippines — Gusto sa mga kadagkoan sa sports sa nasud nga makapadayon sa labing dali nga panahon ang mga nasudnong atleta nga mi-qualify na sa Olympics sa ilang preparasyon alang sa Tokyo Summer Games nga nasibog sunod tuig. Mao kini ang hinungdan nganong ang Philippine Sports Commission (PSC) ug Philippine Olympic Committee (POC) nagkahiusa paghangyo sa Inter-Agency Task Force (IATF) nga tugotan na ang pagbalik sa training sa upat ka mga national athletes nga kwalipikado na ug kadtong duna pa'y tsansa nga mo-qualify sa Olympics.

Nakab-ot nila ang maong lakang human sa usa ka virtual meeting nga gipasiugdahan sa PSC Board ubos sa pagpangu ni officer-in-charge Ramon Fernandez uban ni POC President Bambol Tolentino niadtong Martes.

“We initiated the meeting with POC with the good  of our national athletes in mind. Lagi yan priority as Chairman Butch Ramirez always say” matud pa ni Fernandez.                  

 Bisan tuod og nagpadayon pa ang hulga sa coronavirus, apan alang ni Fernandez dili kini rason nga mawad-an sila og panglantaw nga ihatag ang labing maayo alang sa kampanya sa nasud nga makabira sa dugay na kaayo niining gihandum nga labing unang gold medal sa Olympics.

Miangkon hinuon si Fernandez nga ang tanan nilang mga plano ug buot nga pagabuhaton mag-agad sa mga kamot sa IATF.