Diaz mas maingat na sa social media
Para makaiwas sa bashers
MANILA, Philippines — Ingat na ingat na si Rio Olympics silver medalist Hidilyn Diaz sa paglalabas ng opinyon nito upang makaiwas sa matinding bashing sa social media.
Marami nang natutunan si Diaz sa kanyang mga nakalipas na karanasan at natuto na ito kung paano i-handle ang mga sitwasyon tulad ng social media bashing ng mga trolls.
Magugunitang umani ng batikos si Diaz nang mag-post ito sa social media ng kanyang mga kailangan sa kanyang training para sa Olympic Games.
May ilang naka-appreciate sa kanyang ginawa bilang atleta ngunit marami rin ang pumuna sa kanya.
Aminado si Diaz na malaki ang naging epekto nito sa kanya lalo na sa kanyang pamilya.
Hindi sanay ang 29-anyos sa mga ganung sitwasyon na itinuturing nitong first time experience.
Subalit mula sa naturang insidente, natuto na ito.
At hangga’t maaari, ayaw ni Diaz na mangyari rin ito sa kanyang mga kapwa atleta.
“Naging biktima rin ako sa bashing na hindi naging maganda para sa akin and ayokong mangyari yun sa ibang atleta. Kailangan nating protektahan ang sarili natin,” ani Diaz.
Maliban sa pilak sa Rio Olympics, naka-ginto rin si Diaz sa Asian Games sa Jakarta, Indonesia noong 2018 at SEA Games sa Manila noong 2019.
Kasalukuyang nasa Malaysia si Diaz para sa kanyang training sa Tokyo Olympics at nasa mabuti itong kundisyon sa Malaysia at ligtas sa coronavirus disease (COVD-19).
- Latest