Online tourneys kabahin sa 'new normal' sa sports

CEBU, Philippines — Sa dagan karon sa panahon, dili malalis nga ang mga online tournaments mamahimo nang kabahin sa pagatawgon nga 'new normal' sa sports taliwala ning kalibutanhong krisis panglawas.

Gani nagsugod na kini dinhi sa nasud, gikan sa chess ngadto sa dancesport ug taekwondo.

Ang mga Sugboanong atleta dali kaayong naka-adjust sa pagduwa pinaagi sa online diin sila mipakita gilayon og maayong labok. 

Niadtong Mayo, pipila ka sakop sa Dancesport-Team Cebu City ang mikulit og kasaysayan human makadaog og silver ug bronze medals sa labing unang 1World Dance Online Competition nga giorganisar didto sa Italy.

Ang magtiayong Shardie Abellana ug Marjorie Pasaje, bisan og nagpuyo ubos sa lockdown sa Alaska, Mambaling, mibira og silver sa 35-under Latin-rumba dance, samtang si Trixie Dicdican sa Barangay Ermita nakakuha og bronze sa under-13 lady-solo five event.

Sa 2020 Smart/MVP Sports Foundation National Taekwondo Poomsae Championships nga gipahigayon online sayo ning bulana, ang mga Cebuano jins misidlak sab ubos sa pagpangu ni Philippine team member Aidaine Laxa nga nakakubit og silver sa women's open division.

Ang Cebu School of Chess (CSC) ni International Master Kim Steven Yap ug Cebu Executives and Professionals Chess Association (CEPCA) ubos sa liderato ni Engr. Jerry Maratas nagpasiugda sab og mga torneyo online aron ipabiling buhi ang chess dinhi sa Sugbo.

Kulang man tuod kini sa kahinam ug kasadya kon itandi sa aktuwal nga kompetisyon, ang mga Pinoy'ng atleta angayan makat-on paggakus ning 'new normal' sa sports.