Jordan midonar $100 milyones

CEBU, Philippines — Si Michael Jordan mitunol og record $100 million nga donasyon sa mga grupo nga nakigbatok sa racial equality ug social justice taliwala sa nagbaha nga protesta didto sa Amerika.

Sa opisyal nga pamahayag, ang NBA legend nagkanayon nga iyang iapud-apod ang maong kuwarta sud sa 10 ka tuig sa nagkadaiyang organisasyon sa tinguha nga ibton ang gihulagway niyang nanggamot na nga racism.

Ang gisaad ni Jordan maoy labing dakong pinansiyal nga kontribusyon ngadto sa mga non-profit groups gikan sa usa ka personalidad sa kalibotan sa paugnat sa kusog.

Players union mihangyo

Mihangyo ang players union og dugang negosasyon uban sa  kadagkoan sa liga sa dili pa nila hingpit nga uyonan ang plano nga ibalik ang aksiyon ning naputol nga season sunod bulan didto sa Florida. Matud pa sa National Basketball Players Association nga giaprubahan na sa mga representante niini ang lab-as nga hugna sa pakig-estorya uban sa liga kabahin sa pagtiwas sa mga duwa diin 22 ka teams na lang ang mahibilin.

Gitaho sa ESPN nga ang mga players uyon sa mga sugyot ni commissioner Adam Silver nga aprubado na sa NBA Board of Governors apan duna lang sila'y pipila ka mga detalye nga gustong klaruhon ug plansahon.

Hepe sa PBA makig-dayalogo sa mga players

Usa ka dayalogo uban sa mga representante sa 12 ka PBA teams ang gikatakda duha ka semana gikan karon aron pasabton ang mga players kon unsay tumong sa giplastada nga mga lagda sa liga sa panahon nga tugotan na sila sa kagamhanan nga makabalik sa ilang training.         

Si PBA commissioner Willie Marcial molingkod uban sa tagurha ka representante matag team karong Hunyo 23 aron hisgutan ang maong mahinungdanong butang.

Tataw nga masentro sa diskusyon mao ang kaluwasan ug panglawas sa mga players ilabi na kay si San Miguel Beermen star guard Chris Ross mikuwestiyon kon unsay gidalian sa PBA nganong pulgoso kaayo kining ibalik ang ilang praktis nga mabalik ang aksiyon sa liga nga unya pa man sa Septiyembre labing sayo.    

"Magpapatawag tayo ng dialogue, we'll reach out to the players," matud pa ni Marcial segun sa taho sa PBA.ph. "Kukunin namin yung consensus nila, yung opinion nila, kung ano ang tingin nila doon sa mga gagawin natin.

"At the same time, mapapaliwanag ko rin sa kanila yung mga protocols na gagawin kung payagan na ang PBA teams na makapag-practice," dugang pa ni Marcial.

Human giaprubahan sa Board of Governors, ang PBA misumite dayon sa IATF (Inter-Agency Task Force) sa mga lagda nga ilang gihulma aron i-implementar kon ugaling tugotan na ang mga teams nga makabalik sa ilang training.

Nanghinaut si Marcial nga ang IATF duna nay desisyon sa ilang hangyo sa panahon nga iyang ihimamat ang 24 ka mga players.