UAAP opening sa first quarter ng 2021?
MANILA, Philippines — Plano ng pamunuan ng University Athletic Association of the Philippines na buksan ang Season 83 sa unang bahagi ng 2021.
Ito ang isa sa mga pinag-aaralan ng UAAP management committee dahil kailangan ng mga opisyales na magdesisyon base sa patakarang ipinatutupad ng pamahalaan sa coronavirus disease (COVID-19) pandemic.
Ayon kay UAAP executive director Rebo Saguisag, ilang mahahalagang puntos ang kailangang isaalang-alang gaya ng pagbabawal ng gobyerno na magsagawa ng mga mass gatherings.
Kabilang din ang direktiba ng Philippine Sports Commission (PSC) na “no vaccine, no sport.”
Lilinya rin ang UAAP alinsunod sa inihayag ng Department of Education ng pagbubukas ng klase sa Agosto 24 para sa elementary at high school, at Setyembre 1 naman na anunsiyo ng Commission on Higher Education para sa college students.
Bibigyan din ng UAAP ng konsiderasyon ang mga apektado sa usapin sa playing eligibility kung saan papayagang makapaglaro ang lahat ng may fifth-year playing year na hindi natapos ang mga torneo noong Season 82.
Kasama rito ang mga student-athletes na lampas na sa age limit na 25-anyos.
Kailangang kasama ito sa lineup sa nakanselang Season 82 at kasalukuyang naka-enroll sa unibersidad para makapaglaro sa Season 83.
Halimbawa na rito ang volleyball tournament na ilang linggo lamang tumakbo bago tuluyang makansela dahil sa coronavirus.
Ilan sa mga volleyball players na may last year playing eligibility noong Season 82 ay sina Kat Tolentino at Jhoanna Maraguinot ng Ateneo de Manila University at Risa Sato ng National University.
Nakatakdang magpulong sa mga susunod na linggo ang UAAP Board of Managing Directors upang plantsahin ang mga plano nito sa Season 83 na itataguyod ng season host De La Salle University.
- Latest