'No mercy' maloloy-on: Gesta nanghatag pagkaon mga frontliners sa California

CEBU, Philippines — Ginganlan siya og 'No Mercy' sa kalibutan sa boksing.

Apan sud sa iyang dughan, napuno siya og kaluoy nga misidlak sa kasingkasing sa uban ning panahon sa krisis.

Inabagan sa Epic Wings chain of restaurants, ang Sugboanong boksidor nga si Mercito 'No Mercy' Gesta gikan sa Labogon, Dakbayan sa Mandaue mihatag og mga pagkaon sa mga first responders ug frontline workers didto sa California labi na sa San Diego County diin au na siya karon magbasi.

"Honored to give back to our first responders. Giving back to my community is always in my heart. It is my happiness and it is my passion. I love the opportunities to give what I have and do more than I can," matud pa ni Gesta sa eksklusibong feature ni Neil Macasadia nga gi-post sa opisyal niyang website nga mercitogesta.com.

Apil sa nabuligan sa kaayo ni Gesta mao ang mga sakop sa San Diego Police Department, nga health care professionals sa Gateway Medical Group sa Chula Vista ug Kaiser Permanente medical offices sa Bonita nge beterinaryo sa Banfield Pet Hospital sa La Jolla ug mga health care personnel sa Kaiser Permanente didto sa Irvine.

"You are all my true super heroes and I thank you from the bottom of my heart," matud pa ni Gesta.

Ang 32-anyos nga si Gesta maoy kasamtangang World Boxing Organization (WBO) NABO lightweight champion.

Iyang nasakmit ang titulo human gipilde si Robert Manzanarez pinaagi sa majority decision niadtong Hunyo 14, 2018 didto sa Fantasy Springs Casino sa Indio.

Na-knockout siya ni Juan Antonio Rodriguez sa wala pa siya makatabla ni Carlos Morales sa miagi niyang away niadtong Nobiyembre 14, 2019 didto sa Belasco Theater sa Los Angeles.

Si Gesta (32-3-3, 17KOs) miaway kanhi alang sa World Boxing Association (WBA) lightweight title, apan napilde pinaagi sa unanimous decision sa Mehikanong si Jorge Linares niadtong Enero 27, 2018 didto sa The Forum sa Inglewood.

Wala pa man tuod niya makab-ot sa pagka karon ang iyang damgo nga ma-world champion, apan si Gesta usa na ka kampiyon sa kinabuhi gumikan sa maayo niyang gawi nga nakatandog sa kinabuhi sa uban.