Maraño sumali sa pamamahagi ng relief goods

MANILA, Philippines — Nakiisa si F2 Logistics middle blocker Aby Maraño sa pamamahagi ng relief goods sa mga naapektuhan ng krisis dulot ng coronavirus disease (COVID-19).

Isa si Maraño sa mga tumugon sa panawagang makalikom ng pondo para makatulong sa mga frontli­ners gaya ng health workers gayundin sa mga volleyball personnel na nawalan ng trabaho dahil sa pagkakahinto ng mga volleyball tournaments.

Ilang jersey at personal memorabilia na ang ibi­nigay nito sa ilang fundraising projects tulad ng Volleyball Community Gives Back (VCGB) na nagnanais makatulong sa COVID-19 fight.

Kabilang sa mga natulungan ng VCGB ang ilang hospital na nakatanggap na ng personal protective equipment (PPEs), surgical gloves at surgical caps.

Namahagi rin ang grupo ng relief goods sa mga volleyball technical officials at court assistants na nawalan ng trabaho dahil sa coronavirus pandemic.

‘While everything is in the middle of chaos and uncertainty about what’s in store for us in the future given the fact that this pandemic is so difficult to handle, the volleyball community has come united to help and provide support to our frontliners, volleyball technical officials and court assistants,” ani Maraño sa kanyang post sa social media.

Kita sa larawan na kasama si Maraño sa pamamahagi ng relief goods sa iba’t ibang lugar upang maipaabot ang tulong ng VCGB sa mga apektadong volleyball personnel.

Nagpasalamat si Maraño sa lahat ng sumuporta at patuloy na sumusuporta sa fundraising project.

Sa kasalukuyan, may 2,020 PPEs, 1,000 surgical gloves at 1,000 surgical caps na ang naipamahagi ng VCGB sa iba’t ibang ospital sa bansa habang ilang food packs na rin ang naipamigay.

May ipinagagawa pang 600 microfibre PPEs ang VCGB para sa susunod na bugso ng pamamahagi nito.