POC election tuloy — Bambol
MANILA, Philippines — Tuloy pa rin ang itinakdang eleksyon ng Philippine Olympic Committee sa Nobyembre sa kabila ng banta ng coronavirus disease (COVID-19).
“Most probably it will push through as mandated in our constitution,” wika kahapon ni POC president Abraham “Bambol” Tolentino ng cycling na tumalo kay Philip Ella Juico ng athletics association para sa top post noong Hulyo ng nakaraang taon.
Sinalo lamang ni Tolentino ang naiwang termino ni boxing head Ricky Vargas na bumaba ng kanyang puwesto.
Naksaad sa POC constitution and by-laws na maaaring ihayag ng mga lalaban kay Tolentino ang kanilang hangarin sa huling linggo ng Nobyembre.
Noong nakalipas na buwan ay inihayag ng International Olympic Committee na hahayaan nila ang mga National Olympic Committees na magdesisyon kung susundin ang four-year term.
Maaari ring sundan ng mga NOCs ang Olympic Games cycle at gawin ang kanilang mga eleksyon sa susunod na taon matapos ipagpaliban ang 2020 Tokyo Games bunga ng COVID-19 pandemic.
Nilinaw din ng IOC na puwede nilang bigyan ng extension ang inisyal na termino ng mga NOC presidents, ngunit ito ay limitado lamang.
- Latest
