Eumir Marcial nagpatabang ni Atty. Aranas

CEBU, Philippines — Ang Pinoy'ng Olympic boxer nga si Eumir Felix Marcial mikonsulta ni tax lawyer ug sportsman Clint Aranas aron siya tabangan nga mohulma og maayong ugma sa iyang karera partikular na sa buhis ug ligal nga mga matang. Si Aranas, kanhi presidente sa Government Service Insurance System (GSIS) ug ex-deputy commissioner sa legal affairs sa Bureau of Internal Revenue (BIR), maoy kasamtangang presidente sa  World Archery Philippines.

Ang 24-anyos nga si Marcial nagkanayon nga iyang gihimo ang maong lakang gumikan kay gusto niyang likayan ang nahitabo sa ubang mga boksidor nga mitiurok balik sa pagkapobre human nakatagamtam og tumang kasikat ug popularidad.

"Marami na po kasi ako nabalitaan, nabasa na mga stories ng mga professional boxing champions na sumikat, yumaman pero sa huli halos ubos ang pera nila. Madalas iisa ang dahilan, nagkaproblema sa taxes nila," matud pa ni Marcial.

Si Marcial nga usa sa labing hayag nga paglaum sa Pilipinas nga makabira sa labing una niining gold medal sa Olympics, midugang nga si Aranas maoy iyang gipangita gumikan kay gawas sa duha ka dekada niining kasinatian pagkwenta og buhis, duol sab ang dughan niini sa mga atleta isip National Sports Association (NSA) head.

"Recommended po si Atty. Clint at alam ko mas maiintindihan niya kalagayan ko kasi NSA leader po siya kaya may puso talaga para sa mga atleta na tulad ko," dason pa ni Marcial.

"Mas nagkaroon po ako ng confidence na magiging successful ako hindi lang as boxer kungdi as someone na magkakaroon ng business dealings dahil may isang lawyer po ako na makakasama at mapapagkatiwalaan," dugang pa niya.

Dili pa lamang dugay, si Marcial nakadawat og makadani nga mga tanyag aron mag-pro apan sa pagka karon dili pa siya mopirma og bisan unsang kasabotan.

Si Marcial misaad nga iyang tahuron ang iyang obligasyon nga mo-away una alang sa nasud sa 2020 Tokyo Olympics sunod tuig sa dili pa siya motikang sa pro.