Nietes paabot lang sa iyang 'dream fights'
CEBU, Philippines — Wala na makaaway sud sa 15 ka bulan si four-division world champion Donnie 'Ahas' Nietes sa ALA Gym.
Sa dagan karon sa panahon, daw mataud-tauran pa ang iyang pagpahuway gikan sa ring gumikan sa kalibutanhong pandemya.
Bisan pa man niini, si Nietes wala gihapon mawad-i og paglaum kabahin sa gidamgo niyang mga away, butang nga iyang buot niyang kab-uton sa dili pa maghuna-huna og retiro sa edad nga 38, tataw nga talisaop na ang iyang karera.
Kon siya maoy pabut-on, ang garbo sa Murcia, Negros Occidental nagkanayon nga gusto niyang harungon ang labing bug-at nga mga pangan karon sa super flyweight division.
Apil sa iyang listahan mao sila si Juan Francisco Estrada sa Mexico, Srisaket Sor Rungvisai sa Thailand, Roman 'Chocalalito' Gonzalez sa Nicaragua ug Kazuto Ioka sa Japan.
Si Ioka maoy boksidor nga gipukan ni Nietes pinaagi sa split decision aron birahon ang ikaupat niyang titulo sa upat nga weight division sa katapusan niyang away niadtong Disyembre 31, 2018 didto sa Wynn Palace Cotai sa Macau.
Sa wala pa biraha ang WBO super flyweight belt, si Nietes kanhi naghari sa WBO minumumweight ug light flyweight ug IBF flyweight divisions.
"About sa boxing, paabot lang ko og naa na'y motubag sa akong mga hagit ug kanang worth sab sa akong price,'sumala pa ni Nietes.
- Latest
