Kasaysayan ni asi nalangan sa virus

CEBU, Philippines — Human gikuha og balik sa NLEX Road Warriors niadtong Enero, si Asi Taulava nagpanikad nga mahimong bugtong PBA player nga nakaduwa sa liga sud sa upat ka managlahing dekada.

Si Taulava nanginahanglanna lang og usa ka duwa  aron makab-ot ang maong makasaysayanong dungog.    

Apan ang gibansagan nga 'The Rock' magpaabot usa og taud-taud nga panahon gumikan kay wala pa'y klaro kon unsay madangatan sa PBA Season 45 nga nasuspenso gumikan sa krisis sa Covid-19.

Samtang ang PBA naglantaw nga mopadayon sa regular nilang operasyon ning hinapos sa bulan o sa sayong bahin sa Hunyo, walay pa'y klaro kon kanus-a mabalik ang aksiyon sa liga sa pagka karon.

Gikonsiderar nga usa sa labing dominante nga sentro sa liga, si Taulava nagsugod sa iyang karera sa PBA uba sa Mobiline Phone Pals niadtong 1999 diin siya miduwa sud sa walo ka tuig.

Ang 6-foot-9 nga Fil-Tongan miduwa dayon sa Coca-Cola Tigers (2007-2010) sa wala pa mitapon sa Meralco Bolts (2010-2012).         Nalabyog sila sa Air21 Express nga karon NLEX na gikan sa 2013 hangtod karon.

Natilawan ni Taulava ang labing hayag nga bahin sa iyang karera niadtong 2003 sa dihang gibayaw siya nga Most valuable Player human giagak ang Talk 'N Txt Phone Pals ngadto sa kampiyonato sa PBA All-Filipino Conference.