Hangtod nga di malibkas ang kwarantin PSC: 5-on-5 basketball dili pa tugotan
CEBU, Philippines — Mataud-tauran pa ang mga Pinoy nga makaduwa og balik sa numero unong kalingawan sa nasud.
Kini gumikan kay ang Philippine Sports Commission (PSC) pinaagi sa Philippine Sports Institute mipagawas og lagda nga magtugot lamang sa tanan nga makaduwa og 5-on-5 basketball kon ugaling hingpit nang malibkas ang kwarantin.
Ubos sa maong lagda, mahimo lamang nga mopahigayon og “ball ug skill drills" atubangan sa balay ug ingon man sa mga sudlonon nga publikong dalan atubangan sa panimalay kadtong mga tawo nga nagpuyo sa National Capital Region o sa mga dapit nga anaa na sa Modified Enhanced Community Quarantine (MECQ).
Samtang kadtong gibutang na karon sa General Community Quarantine (GCQ) puwede nang magsolo nga mogamit sa usa ka public basketball o village court, apan dili sila mahimong makaduwa og laing tawo ug ingon man magsawo og gamit.
Ang mga lagda nga gihulma sa PSC inabagan sa Department of Health ug Inter-Agency Task Force, gipagawas aron magiyahan ang tanan kon unsay puwedeng buhaton ug mga ginadili sa kalibotan sa paugnat sa kusog samtang nagpabilin pa ang kwarantin ning panahon sa krisis.
- Latest