Jerusalem gusto makig-rematch ni Menayothin

CEBU, Philippines — Kon dunay usa ka butang nga nakapalipay ni ALA boxer Melvin 'El Gringo' Jerusalem ning panahona, kini mao ang labing uwahing World Boxing Council (WBC) rankings nga nagpabilin kaniyang No.1 contender sa minimumweight (105 lbs.) division.

Ang garbo sa Manolo Fortich, Bukidnon usa sa tulo lamang ka mga boksidor nga nahibilin karon sa ALA Gym gumikan kay ang ilang kauban nanguli man sa tagsa-tagsa nila ka mga lugar taliwala ning pandemya.

"Ning panahon sa krisis, magmalig-on lang gyud ta. Tuman sa mando sa atong gobiyerno, dili mawad-an og paglaum, ug ampo lang gyud ta sa kanunay. Dili ta pasagdan sa atong Ginoo, ma-OK rani ang tanan,"  matud pa ni Jerusalem.

Samtang natanggong sa gym, gipahimuslan ni Jerusalem ang sitwasyon pinaagi sa pagpadayon sa iyang training dili lamang aron magpabilin siya sa kondisyon aron sab i-andam ang iyang kaugalingon  kon unsa man gani sunod nga mahitabo sa iyang karera.

"Sa pagka karon, padayon lang ko sa akoang training kay naa ra man ko sa gym," sumala pa sa 26-anyos nga si Jerusalem.

Sa WBC 2020 May ratings, si Jerusalem mao gihapon ang No.1 minimumweight contender. Nagbutang kini kaniya sa labing maayong posisyon alang sa gihandum niyang rematch ni reigning WBC champion Wanheng Menayothin (45-0, 17KOs).

 Atol sa una nilang engkuwentro niadtong Enero 25, 2017 didto sa Thailand, si Jerusalem hapit makapasol og dakong isda human siya napilde lamang pinaagi sa sikit kaayong unanimous decision ngadto sa wa'y pildeng Thai ring star.

Wala kalimti ni Jerusalem (15-2, 9KOs) kadtong hitaboa ug nanghinaut siya nga makabawos ni Menayothin sa umaabot.

"Malipayon kaayo ko nga No. 1 na ko sa WBC. Da ako pasalamat sa ALA Promotions nga wala ko nila pasagdi," kanayon pa ni Jerusalem. "Og hatagan ko'g chance nga makadula puhon, gusto ko maka-rematch ni champ Menayothin."