Pagdaraos ng sports events may mga kondisyon na dapat sundin
MANILA, Philippines — Mayroong ilang sports events na maaaring gawin sakaling tuluyan nang alisin ang enhanced community quarantine sa National Capital Region at ilang probinsya.
Ngunit may mga kondisyon na dapat sundin habang wala pang nadidiskubreng bakuna laban sa coronavirus disease (COVID-19).
Ilan sa mga sports na binanggit ni Philippine Sports Commission Chairman William “Butch” Ramirez sa Inter-Agency Task Force (IATF) ay ang golf, running, hiking, badminton singles event, softball, baseball, skateboarding, tai chi, kung-fu, taekwondo singles event at online chess.
Kailangan sundin sa pagdaraos ng mga nasabing sports events ang protocol na inilatag ng IATF laban sa COVID-19.
Kamakailan ay sinabi ni Ramirez na kinansela na ng PSC Board ang mga sports events para ngayong taon dahil sa COVID-19 pandemic.
Kabilang sa mga ito ay ang taunang Philippine National Games at Batang Pinoy habang iniurong na rin ng sports agency ang pagbibigay ng financial assistance para sa 10th ASEAN Para Games.
“Until a vaccine is found, we can not really organize and hold sports the way we used to before COVID-19,” wika ni Ramirez.
Ginawa na ring mga quarantine facilities para sa mga pasyente ng COVID-19 ang Rizal Memorial Coliseum at Ninoy Aquino Stadium sa Vito Cruz, Manila at ang Philsports Complex sa Pasig City.
Ang nasabing mga pasilidad ay nasa ilalim ng pamamahala ng PSC.
- Latest