Pacquiao-Mayweather"rematch" madayon?

CEBU, Philippines — Kumbinsido ang tag-iya sa Premier Boxing Champions nga si Al Haymon nga mahitabo sa dili madugay ang "rematch" tali nilang super WBA welterweight champion Manny Pacquiao ug sa walay pildeng si Floyd Mayweather Jr.

"I thinks it's coming," matud pa sa usa ka kasaligang tinubdan segun sa taho ni Quinito Henson sa The Philippine STAR, igsuong mantalaan sa Banat News.

Sa pagka karon, wala pa'y klaro kon kanus-a mabalik ang aksiyon sa boksing gumikan coronavirus pandemic, apan basi sa pangagpas sa uban ma-normal na ang tanan lagmit karong Hunyo didto sa Amerika ug Europe.

Apan gipanglantawan nga ang mga boxing events sa umaabot ipahigayon ubos sa kontroladong kondisyon apil na ang pag-limit sa mga manan-aw.

Bahin ni Pacquiao, gikatakda unta siyang moaway didto sa Saudi Arabia karong Hulyo diin si Mikey Garcia maoy nag-unang kandidato nga sunod niyang sangkaon. Sa dihang mibuto ang taho nga si Mayweather mibalik sa gym, si Pacquiao nagkanayon nga ang sunod niyang kontra naglutaw pa karon sa hangin.

"It depends on Floyd,"

sumala pa ni Pacquiao agi'g indikasyon kon kinsay nag-una sa iyang listahan aron gusto niyang sangkaon sunod.