Dul-an 100 ka Kobe memorabilia i-auction
CEBU, Philippines — Usa ka dakong koleksiyon sa mga memorabilia kon handumanan ni anhing Kobe Bryant ang i-auction pinaagi sa online hangtod karong Mayo 17.
Naglangkob sa dul-an 100 ka mga items nga puwedeng maila sa mga fans nga maka-afford pagpalit niini mao ang mga sapatos nga gisul-ot sa Los Angeles Lakers legend sa usa ka NBA Finals ug ingon man ang championship ring nga orihinal nga gipanag-iya sa iyang inahan nga si Pam Bryant.
"We believe it is the largest collection ever in one place of Kobe Bryant memorabilia," matud pa ni Ken Goldin sa Goldin Auctions segun sa tano ni Dave McMenamin sa ESPN.
Gawas sa mga sapatos ug jersey, lain pang mga butang ni Kobe nga i-auction mao ang 14-karat gold ring nga gidayan-dayanan og walo ka diyamante ug may pangan ni Bryant aron pagtimaan sa 8-0 record sa Team USA niadtong 2012 Olympics diin sila ang midaog sa gold medal.
Si Goldin nangagpas nga ang mga presyo unya sa auction mokabat gikan sa $500 (P25,000) ngadto sa $100,000 (P5 million).
Si Bryant nga miduwa sa entiro 20 ka tuig niya sa NBA uban sa Lakers, namatay sa helicopter crash niadtong Enero 26 uban ang iyang anak nga si Gianna ug lain pang pito ka tawo.
- Latest
