Obiena tutok sa target na Olympic gold
MANILA, Philippines — Walang nagbago sa target ni Southeast Asian Games record holder Ernest John Obiena - ang masungkit ang gintong medalya sa Olympic Games na idaraos sa susunod na taon sa Tokyo, Japan.
Aminado si Obiena na mahirap ito ngunit desidido ang Pinoy bet na gawin ang lahat para maabot ang kanyang pangarap.
Kailangan ni Obiena na malampasan ang 6.03m na kasalukuyang gold standard sa Olympics.
“I’m after the gold. If that means I need to jump 6.03 or higher, then I would do everything that I can to jump that. I’m working as hard as I can to achieve that feat. My goal is to win. The height comes after,” ani Obiena.
Kasama ni Obiena sa training camp sa Formia, Italy ang mahuhusay na trainers, strength and conditioning experts at ilang world champions.
Sa katunayan, kasabay ni Obiena sa pagsasanay si Brazilian champion Thiago Braz da Silva - ang gold medalist sa men’s pole vault sa 2016 Olympic Games sa Rio de Janeiro, Brazil.
Hawak ni da Silva ang rekord sa Olympics.
Naitala ni da Silva ang impresibong 6.03 metro noong Rio Olympics para tabunan ang 5.97m na dating marka ni world champion Renaud Lavillenie ng France noong 2012 London Olympics.
Kaya naman masaya si Obiena na kasabayan nito si da Silva sa training.
Malaking bagay ito para kay Obiena na nagnanais makakuha ng teknik at estilo mula sa Olympic champion.
Matagal na ring magkasama sina Obiena at da Silva. Nagsimula ito noong 2014 kaya’t magkakilala na ang dalawang atleta.
Pansamantalang itinigil ang ensayo sa Formia dahil sa umiiral na quarantine doon.
Isa ang Italy sa may pinakamaraming bilang ng tinamaan ng Covid-19 kung saan libu-libo nang Italians ang namatay.
- Latest
