Gigi Bryant gipasidunggan sa WNBA

CEBU, Philippines — Anak ni Los Angeles Lakers legend Kobe Bryant nga si anhing Gigi Bryant ug ang lain pa niyang duha ka teammates sa Mamba Academy, gipasidunggan atol sa WNBA Draft kagahapon.

Ang 13-anyos nga si Gigi ug ang iyang mga kauban nga sila si Alyssa Altobelli ug Payton Chester ginganlan nga honorary draft picks sa wala pa magsugod  ang digital 2020 Draft.

Sulagma kaayo nga ang pambato sa Oregon nga si Sabrina Ionescu, nga suod kaayong higala ni Gigi ug Kobe, maoy gibunlot nga No. 1 overall pick sa New York Liberty.

Sila si Gigi, Altobelli ug Chester apil sa siyam ka tawo nga namatay sa helicopter crash nga mikalas sab sa kinabuhi ni Bryant niadtong Enero 26 didto sa Calabasas.

Si Gigi giisip nga usa sa labing sanag nga batan-ong bitoon sa women's basketball ug gani gipanglantawan sa kadaghanan nga siya maoy ugma sa WNBA.

"These athletes represented the future of the WNBA – players who were following their passions, acquiring knowledge of the game, exhibiting skills that were way beyond their years," matud pa ni WNBA commissioner Cathy Engelbert.

"They represented the next generation of stars in our league, maybe what might have been called the 'Mambacita Generation'," dugang pa niya.