Batch 2004 sa PBA draft namungingi og mga bitoon, yap labing masidlakon

CEBU, Philippines — Namungingi og mga bitoon ang Batch 2004 sa PBA Draft, apil na niini ang bag-o lang miretiro nga si Ranidel de Ocampo nga maoy No. 4 pick niadtong higayona.

Naglangkob sa mga dekalibreng basketbolista nga misulbong sa PBA niadtong panahona mao sila si James Yap, Marc Pingris,   Sonny  Thoss, Rich Alvarez ug Gary David.

Ang two-time UAAP MVP nga si Alvarez maoy gibunlot sa Shell nga No.1 overall pick ug gipasidunggang "Rookie of the    Year"  niadtong season, apan   si  Yap  (No. 2 pick)  maoy labing masidlakon      nilang tanan.

Si Yap duha ka higayon nga mahimong MVP ug nakadaog og talagsaong  grandslam title uban sa San Mig Coffee niadtong 2013-2014.

"It's one of the best (drafts). During that year, you can’t go wrong with any of the first five," matud pa sa opisyal sa SBP nga si Ryan Gregorio segun sa taho ni Nelson Beltran sa The Philippine STAR, igsuong mantalaan sa Banat News.

Si Gregorio maoy mi-draft ni Yap aron pagtukod og lig-ong pundasyon sa Purefoods team nga miresulta ngadto sa pagsakmit nila og daghang kampiyonato.

Lain pang mga top picks sa maong batch nga mipakita og  maayong labok sa liga mao sila si Denver Lopez (No. 6 sa Red Bull), Ervin Sotto (No. 7 sa Purefoods), Nelbert Omolon (No. 8 sa Sta. Lucia) ug Wesley Gonzales  (No. 9 sa FedEx).