Letran magpapalakas para sa NCAA Season 96
MANILA, Philippines — Desidido ang Colegio de San Juan de Letran na maipagtanggol ang titulo nito sa National Collegiate Athletic Association (NCAA) Season 96 men’s basketball tournament.
Kaya naman palalakasin ng Intramuros-based squad ang lineup nito para sa masukbit ang inaasam na back-to-back titles sa susunod na edisyon ng liga.
Agad na magsasagawa ng tryout ang Letran sa oras na matapos na ang Enhanced Community Quarantine (ECQ) na ipinatutupad ng gobyerno sa buong Luzon upang maiwasan ang pagkalat ng coronavirus (Covid-19).
“The Petron-Letran Knights, reigning NCAA champions, are in need of qualified basketball players to be part of its winning team. An upcoming tryout schedule will be announced once the enhanced community quarantine is over,” ayon sa statement ng Letran management.
Malaking butas ang pupunan ng Knights sa pagkawala ni Letran ace Jerrick Balanza gayundin ng mga kapwa beteranong sina Bonbon Batiller, Christian Balagasay at Tommy Olivario.
Maiiwan ang pasanin kina Fran Yu, Larry Muyang at Jeo Ambohot.
Si Yu ang itinanghal na Finals Most Valuable Player noong Season 95.
Magbabalik-aksiyon na rin si Christian Fajarito.
Hahawakang muli ni veteran coach Bonnie Tan ang Knights.
Magugunitang hinubaran ng Letran ng korona ang three-time champion San Beda University noong nakaraang taon.
Ito ang unang titulo ng Knights sapul noong 2015 at ika-18 kabuuang korona ng koponan sa liga.
Hindi naging madali ang pagsungkit ng Letran ng naturang korona.
Dumaan muna ito sa butas ng karayom bago makapasok sa finals.
Tinalo ng Letran ang San Sebastian College-Recoletos at Lyceum of the Philippines University sa stepladder semifinals bago makaharap ang San Beda sa best-of-three finals.
- Latest