Magic nanghinaut dunay koronahang kampiyon

CEBU, Philippines — Lagmit wala na'y fans nga manan-aw kon ugaling mabalik na ang aksiyon sa NBA niini nga season.

Mao kini ang gipadayag ni Magic Johnson.

Dili na sab maglisud ang mga players pag-adjust pagduwa sa mga binyu nga wa'y sulod.

Taliwala ning kriris, ang kanhi bitoon sa NBA ug part-owner sa Los Angeles Dodgers baseball team nakakita og paglaum ug nagkanayon nga ang labing kinahanglan mao ang usa lamang ka duwa alang sa mga players nga dili mabag-ohan nga moduwa bisan og walay manan-aw ug moabiba kanila.

"Let's say the NBA comes back without fans. Once you play one game without fans you will adjust to not having fans there," matud pa ni Johnson sa dihang nahinabi sa CNN.

Sa sayo pa, si NBA superstar LeBron James sa Los Angeles Lakers nagkanayon nga dili niya mahulagway ang iyang kaugalingon nga moduwa sa bakanteng mga binyu.

Alang ni Johnson, sakto si James, apan kinahanglan nga ang tanan andam modawat sa sitwasyon.

Bugtong panghinaut ni Johnson nga dunay makoronahang kampiyon ning NBA season gumikan kay mao man kini ang gustong makit-an nilang tanan.

"Those guys want to see who is the world champion. They will go back to crown a champion,"  dugang pa ni Johnson. "They want to see who is the best team in NBA. I am looking forward to seeing if the Lakers can win a championship."