NBA playoffs adto duwaon sa Las Vegas?

CEBU, Philippines — Wala pa man tuoy kasiguroan ang tanan sa kasamtangan, apan gi-estudyohan na sa mga kadagkoan sa NBA ang posibilidad nga duwaon ang entiro playoffs didto sa Las Vegas.

Segun sa taho sa Sports Illustrated, gitun-an na sa liga unsaon pagpahigayon sa mga duwa, apil na niini ang pagpapuyo sa mga players sa mga hotel didto sa Vegas.

Giklaro hinuon sa maong taho nga dili pa final ang tanan ug wala pa sa'y nakab-ot nga kasabotan ang NBA.

Kon ugaling mapapha na kining hulga sa coronavirus ug mabalik na sa normal ang tanan, pipila ka kasaligang mga tinubdan sa liga ang miangkon nga hanap pa sa dyes panas nga masunod sa NBA ang naandan niining format sa playoffs nga magpunay og biyahe ang teams gumikan sa epekto ning sakit sa nakadaiyang mga lugar.

Gumikan niini, ilang gipanglantawan nga usa sa labing maayong solusyon aron mahuman ang kasamtangang NBA season mao ang pagpahigayon sa mga duwa sa usa ka lugar bisan og wa'y manan-aw nga mga fans.

Sa pagka karon, ang Las Vegas pa maoy gisaytan sa NBA nga labing maayong binyu.

Gilantaw sab sa NBA ang pagputol sa unang hugna sa playoffs ngadto na lang sa usa ka best-of-five series. Human niini, dunay duha ka tagakay nga mga duwa aron pagdeterminar kon kinsay mag-abot sa best-of-seven NBA Finals.