Human sa 14 ka adlaw nga quarantine

Players sa Lakers, Nets luwas sa sintomas

CEBU, Philippines — Nakumpleto na sa Brooklyn Nets ug Los Angeles Lakers ang 14 ka adlaw nilang quarantine sa tagsa-taga nila ka balay ug walay bisan usa kanila ang nagpakita og sintomas sa coronavirus.

Mismo ang mga hintungdang koponan ang mikompirmar ning maayong balita kagahapong adlawa.

Ila sab gipahibalo nga padayon nilang sundon ang mga lagda alang sa kaluwasan nga gimando sa mga opisyales sa panglawas ug kagamhanan, ilabi na ang kabahin sa social distancing ug pagpuyo sa usa ka lugar.

Si Nets general manager Sean Marks nagkanayon nga ang upat ka Nets,  apil  niini   si    Kevin Durant nga nagpositibo sa virus wala na karo'y sintomas sa COVID-19.

Ang tanang sakop sa Nets mikumpleto sa ilang home isolation human masayri niadtong Marso 17 nga ang usa nila ka player nagpakita og sintomas sa coronavirus.

Sa iyang bahin, si Durant wala pa makaduwa bisan kausa sukad siya mitapon sa Nets niadtong Hulyo sa miaging tuig gumikan sa injury.