Dokumentaryo ni Jordan ipasalida ning bulana

CEBU, Philippines — Ang 10 ka serye nga dokumentaryo kabahin ni NBA legend Michael Jordan ug sa Chicago Bulls nga nimugna og dinastiya niadtong 1990s nahuman og sayo ug gikatakda kining ipasalida karong Abril didto sa Amerika ug sa nagkadaiyang nasud sa tibuok kalibotan.

Giulohan og "The Last Dance", ang maong dokumentaryo orihinal untang ipagawas unya pa sa Hunyo dungan sa pagsugod sa 2020 NBA Finals sa wala pa gipangsira sa coronavirus pandemic ang mga dagkong liga sa sports didto sa Estados Unidos.

Tungod niini, i-release na lang ang dokumentaryo sugod karong Abril 19 sa ESPN.

Usa si NBA superstar LeBron James ang gibati og tumang kalipay ning maong kalamboan.

"April 19th can't come fast enough. I CAN NOT WAIT!! Yessir!" suwat pa sa four-time MVP sa iyang Twitter.

Si James usa sa mga nangusog nga ipasalida og sayo ang dokumentaryo sa iyang idolo samtang ang kinabag-an sa mga Amerikanhon nag-quarantine sa ilang balay nga walay matan-aw nga live sports events sa telebisyon.

Makita ang dokumentaryo gawas sa Amerika pinaagi sa Netflix sud sa lima ka sagunson nga Lunes sugod karong Abril 20.