Alaska, Cariaso midalit online workout sa fans

CEBU, Philippines — Nasayod sa importansiya nga magpabiling aktibo samtang nagpuyo sa balay gumikan ning enhanced community quarantine, ang Alaska Aces ubos sa pagpangu ni coach Jeff  Cariaso milusad og kampanya nga  ilang gitawag og  "home workout challenge"  alang  sa mga fans ug online followers.

Ubos ning dalaygon nga programa, si Cariaso ug ang pipila sa iyang mga players mopasiugda og pito ka live session sa Home Workout Challenge nga makita sa Facebook page sa Alaska matag alas-2 sa   hapon  sugod   niadtong Lunes  hangtod  sa  Abril 13.

Si Cariaso maoy misikad sa ilang online workout pinaagi sa pagpa-ambit og cardio exercise niadtong Lunes.

Kagahapon si Kevin Racal mipakita kon unsaon ang hustong pamaagi sa core exercise.

Ang mosunod nga mga sesyon naglangkob nilang Abel Galliguez (Abril 3, cardio), Jeron Teng (Abril 6, lower body), Vic Manuel (Abril 8 , cardio), JC Marcelino (Abril 10, upper body) ug assistant coach Danny Ildefonso (Abril 13, core).

Si Manuel mipaambit na sa tibuok video sa iyang routine nga naglangkob og elastic band squats, plank, ladder drills, push-ups, sit-ups ug V-ups.