Obiena masaligon daghan pang Pinoy sa Olympics

CEBU, Philippines — Masaligon si  pole vault champion E.J. Obiena nga daghan pa ang mga Pinoy'ng atleta nga mo-qualifty sa 2020 Tokyo Olympics gumikan sa pagkasibog niini sunod tuig.

Ang prestihiyosong torneyo nga mahitabo kausa lamang sud sa upat ka tuig gikatakda unta karong Hulyo 24 ngadto sa Agosto 9, apan giuswag kini ngadto sa Hulyo 23 ngadto sa Agosto 8, 2021 gumikan sa COVID-19 pandemic.

Alang ni Obiena, ang pagkasibog sa mga duwa makahatag og dugang panahon sa ubang Pinoy'ng atleta nga mo-qualify sa Olympics nga wala nila makab-ot ning higayona gumikan sa pagpanghasi sa virus.

Apil sa gipasabot ni Obiena mao ang duha ka Sugboanon nga sila si skateboard sensation Margielyn Didal ug marathoner Mary Joy Tabal ug ingon man ang Zamboangeña lifter nga si Hidilyn Diaz.

Ang tulo wala pa makaangkon og luna sa Olympics gumikan kay ang mga qualifying events nga ila untang pagasalmotan gipangkanselar o gisibog  gumikan ning krisis panglawas nga mituyok sa tibuok kalibotan. Sa iyang bahin, si Obiena mi-qualify na sa Olympics, apan ang iyang mga kauban nga sila si Eric Cray (400 meter hurdles), Willie Morrison (shot put), Kristina Knott (200-meter) ug Natalie Uy (pole vault) pulos pa nagtirada og tiket sa Tokyo.

Gawas ni Obiena, lain  mga Pinoy nga kwalipikado na sa Tokyo Olympics mao sila si Caloy Yulo ug boxers Eumir Marcial ug Irish Magno.