Gobert, Mitchell at Jazz team negatibo na sa COVID-19

UTAH -- Matapos si Christian Wood ng Detroit Pistons ay sina Rudy Gobert, Donovan Mitchell at ang buong Utah Jazz team naman ang idineklarang negatibo sa pagkakaroon ng coronavirus disease (COVID-19).

Ito ang inihayag kahapon ng Utah Department of Health dalawang linggo matapos magpositibo sina Gobert at Mitchell sa COVID-19.

Ayon sa UDOH, hindi na makakahawa ang buong Utah team, kasama ang staff, sa iba pang tao.

Sa kabila nito ay inoobserbahan pa rin ng mga team members ang social distancing.

Si Gobert ang unang NBA player na nagpositibo sa virus kasunod sina Mitchell at Wood.

Tinamaan din ng COVID-19 sina Kevin Durant at tatlo pang players ng Brooklyn Nets, Marcus Smart ng Boston Celtics at dalawang manlalaro ng Los Angeles Lakers.

“Great. He’s great. Great spirits. Joking as always,” ani Celtics coach Brad Stevens sa pagharap ni Smart sa virus.

Kamakailan ay inihayag ng kampo ni Wood na bumubuti na ang kondisyon ng Pistons big man na nakalaban ni Gobert sa huling laro ng Detroit at Utah.

Matapos magpositibo si Gobert sa COVID-19 ay sinuspindi ng NBA ang kanilang season noong Marso 11.

Sinabi ng Jazz na inilagay ang kanilang mga players sa quarantine o isolation makaraang magpositibo sina Gobert at Mitchell.