Casimero, Ancajas tuloy lang sa training
Para manatiling kundisyon
MANILA, Philippines — Walang balak tumigil sa ensayo sina World Boxing Organization (WBO) bantamweight champion Johnriel Casimero at reigning International Boxing Federation (IBF) super flyweight titlist Jerwin Ancajas sa kabila ng pagkakaudlot ng kanilang laban na parehong gaganapin sana sa Abril.
Makakalaban sana ni Casimero si International Boxing Federation at World Boxing Association bantamweight titlist Naoya Inoue sa isang unification bout sa Abril 25 sa Mandalay Bay Resort and Casino sa Las Vegas, Nevada.
Sa kabilang banda, sasagupain dapat ni Ancajas si Mexican challenger Jonathan Rodriguez sa Abril 11 sa Cosmopolitan sa Las Vegas, Nevada para sa kanyang title defense.
Subalit kinansela ito ng Top Rank Promotions dahil sa banta ng coronavirus (COVID-19).
Sa kabila ng postponement ng laban, hindi hihinto sina Casimero at Ancajas sa pagsasanay.
Ilang linggong namalagi si Casimero sa Miami, Florida kasama si strength and conditioning coach Memo Heredia na dating trainer ni Mexican boxing great Juan Manuel Marquez.
Ngunit nasa Las Vegas, Nevada na ito para doon ipagpatuloy ang kanyang pagsasanay para mapanatiling nasa perpektong kundisyon ito sakaling magdesisyon na ang Top Rank ng petsa kung kailan itutuloy ang laban.
Tiwala si Casimero na siya ang tatanghaling unified champion sa oras na magkrus ang kanilang landas ni Inoue.
“It’s only postponed and not cancelled. There will still be a unified champion in the bantamweight division this year in the name of Johnriel Casimero. Will keep my A-game up until the fight takes place. Thank for your support,” ani Casimero sa kanyang social media account. Tuloy din ang training camp ni Ancajas sa Pilipinas.
Nakatakda na sanang lumipad si Ancajas sa Amerika para sa kanyang laban ngunit hindi na ito natuloy dahil na rin sa desisyon ng Top Rank na ipagpaliban muna ang laban.
Tiniyak naman ng kampo nina Casimero at Ancajas na ipinatutupad ang mahigpit na patakaran upang makaiwas sa coronavirus na lubos na mapanganib sa mga atleta.
- Latest